Jailbreak - Die Rockband aus dem Ybrig

Home » Band » History

History

Wie alles begann...

Annä 1990 hed alles agfangä.. Dä Tihi und dä Hässig hend wellä afä Musig machä. Drum hends dä au alles afä zämä suächä mit dem mr chad Lärm machä. Vo Farbschtift, über Ovomaltinäbüchsä bis zu Chilbitüderli hends alles müässä hinnäfürä schränzä und hend dä mit all dem Grümpel diä erscht Prob ghaltä.
Doch mit dem heds sich dä au scho wider für äs Ziitli gha, dänn diä zwe Glöin hend diä Sach wider ufgä und ds Läbä isch wiiter gangä, wiä wänn si niä zum musiziärä zämä chou wäred! D Sach isch dä vergässä gsi bis annä 1995.. Det sind miär geilä Hengschtä (Brösi, Hässig, Vögi, Tihi, Bruno) wider zämä chou und hend d Idee vonärä eigänä Band jetzt ändlich mal wellä i d Realität umsetzä. Das, obwohl keinä vo üs Gsellä äs Inschtrumänt glehrt hed ds spilä.. Jenschtes Züügs isch kauft wordä!! . Doch dä Roli, de Arm, hed annä dazumal trotzdem nu müässä übärä 2 Watt Bassverschtercher singä...

ILA war geboren

Doch wiä wend miär üs eigentlich nännä, hend miär üs dä scho gli gfraged.. Ä Namä hend müässä anä, mit dem miär üs all chönd idäntifiziärä... Und wo miär amä Abig wider mal chli gärä gsoffä hend (wiä immer), sind miär dä uf eismal uf ILA chou, was so vil bedütet wiä "I love alkohol". Und scho gli hend miär dä üsi erschtä Uftritt chönä verbuächä, wiä zum Bischpil am Autocross Hoch-Ybrig i dä Wäglosä hinnä, wo ä sou ä grausami Schtimmig gherrscht hed, dass d Lüüt tobed hend und ds Fäschtzält grad gfozled hed.
Dur das Fäscht wiit umä Bekanntheit erlangt, hend miär dä au is Dütschä usä as Streetfighter's Hotzenwald chönä, wo miär sehr willkommä gsi sind und wiä du dä Tourdates chasch vernä au hüt nu sind!
Au a Geburtstagsfäscht hesch üs chönä aträffä, wiä anä dazumal, wo miär amä Päärli, wo beidi ihrä 50ischt gfiired hend, gschpilt hend. Diä 80 jährig Muätter vo ihm hed au grausam mitgmacht. Sogar uf dä Bühni obä heig mr si bim headbengä atroffä, sägeds!

Namensänderung und neue Gesichter

D Ziit isch vergangä... Gründigsmitglieder (Vögi, Tihi) sind gangä, anderi sind wider däzuä chou (Meiri, Wisi)... Vili Uftritt hend miär dä i derä nüüä Formation scho wider hinder üs gha, wo miär üs afangs 2001 entschlossä hend dä Namä ds ändärä. Weisch, wäg dä Vorurteil und so...!!
Und jetz schtönd miär hiä, us Fleisch und Bluät mit nüäm Namä, Baby! Jailbreak.. das sind sou zägä diä geilschtä Burschtä vo dä Alpänordsiitä... Überzüüged üch sälber!!
Im Summer 2002 isch dä nu ds langjährigä Mitglied Bruno Ott usträttä, will är sich meh äm Autocross hed wellä witmä. Für ihn isch dä Oberibriger Edwin Marty frisch däzuä gschtoussä!!

Andi Meyer für Sandro Hässig

Im Früehlig 2008 hed sich dä üses Gründismitglied Sandro Hässig entschiede üs ds verlah. Für ihn isch dä Andi Meyer us em Oberibrig frisch däzue gstosse.

To top

Auf einen Blick

  • Erste Gehversuche im 1990
  • ILA wurde 1995 geboren
  • Gründungsmitglieder waren Brösi, Hässig, Vögi, Tihi, Bruno
  • 2001 Namenswechsel in Jailbreak
  • Diverse Ein- und Austritte in der letzten Zeit
  • Aktuelle Mitglieder sind Brösi, Meiri, Wisi, Edwin & Andi